«Мағжан - алаштың сөнбес жұлдызы»
Қазақтың ұлы ақыны, қазақ әдебиетінің классигі, Қазақтың бірлігі, Алаштың азаттығы мен халқымыздың болашағы үшін бар ғұмырын күреспен өткізген зиялыларымыздың бірі, қазақтың ұлы тұлғасы Мағжан Жұмабаевтың 130 жылдығына орай, ДТІЖО Г.Асканбаеваның жетекшілігімен, 1-11 сынып білім алушыларының қатысуымен «Мағжан - алаштың сөнбес жұлдызы» атты мерекелік іс-шара өткізілді. Мағжанның өмір жолын, шығармашылығын, ерлігін барынша еске түсірді. «Мен жастарға сенемін» өлеңі қазақ халқының әрдайым жүрегінде.
Мағжан Жұмабаев 1893 жылы Солтүстік Қазақстан облысының бүгінде өз есімімен аталатын ауылында орташа ғана дәулеті бар отбасында дүниеге келген.1905-1910 жылдары Қызылжар қаласындағы медреседе оқиды. Медреседе бірқатар шығыс тілдерінен дәріс алады, шығыс ақындарының жырларымен танысады. Өзі де әдебиетпен шұғылданады. 1910 жылдың күзінде Уфаға келіп, осындағы Ғалия медресесіне түсіп білімін молайтады. 1913-1917 жылдары Омбыдағы мұғалімдер семинариясында оқиды. Поэзиядағы алғашқы қадамдарынан кейін Мағжан жарқын әрі ерекше таланттың сырын ашады. 1912 жылы жарық көрген «Шолпан» атты поэзия жинағының арқасында Мағжанның есімі кең таныла бастайды.
Іс-шара барысында Мағжанның өлеңдері оқылды. Әрине бүкіл бір ұлтты бір арнаға ұйытатын әйгілі «Мен жастарға сенемін» атты өлеңінен басталды. Өлеңдегі өміршең қуат пен сөнбес жалын жас ұрпаққа рухани күш беріп, қазіргі таңда өмірлік ұранға айналды деуге болады.Сонымен қоса «Тарғын», «Сарғалдым», «Сағындым» өлеңдері оқылды. Домбырамен орындалған небір әдемі халық әндері, күйлері тыңдалды. Мағжан туралы айтылған естеліктерді тамашалап, Мағжан туралы түсірілген фильмдерден үзінді көрсетілді. Іс-шара соңында «Сен сұлу» әнін хормен айтты. Мағжанның айтып кеткен «Мен жастарға сенемін» дегенін бүгінгі жастар ақтай алды ма? деген сұрақтар қойылып қызу талқыланды. Қазақ тілі пәнінің мұғалімі А.Ахметова, ДТІЖО Г.Асканбаева қорытынды сөз сөйлеп, алғысын білдіруімен іс-шара аяқталды.
